ЧАШМОНАШРО КАНДА ГИРИФТАНД… БОЗДОШТИ СЕ НАФАР БАРОИ ҚАТЛИ БЕРАҲМОНАИ ЯК ДУХТАРИ ТОҶИК ДАР КАНОРИ ПЕТЕРБУРГ
Нашрияи маҳаллии Кoнкретно.Ру (хабаргузории “Оперативное прикрытие”) хабар дод, ки мақомоти тафтишотӣ афроди гумонбаршаванда дар қатли ваҳшиёнаи як духтари тоҷик дар вилояти Ленинградро боздошт кардаанд. Ҷасади духтари 20-солаи зодаи Тоҷикистонро бо аломатҳои яқини марги маҷбурӣ рӯзи 2 октябри соли 2021 аз як ҷангал дар наздикии деҳаи Мягловои ноҳияи Всеволожский пайдо карданд. Мяглово дар канори шоҳроҳи Мурманск, дар фосилаи ҳамагӣ 12 км аз канораҳои ҷанубушарқии шаҳри Санкт-Петербург ҷойгир шудааст. Ҷоғи поёнии ҷасад шикаста, дар гарданаш осори буғӣ кардан дида мешуд ва чашмонашро канда гирифта буданд. Дар робита ба ин куштор бо бераҳмии махсус парвандаи ҷиноятӣ оғоз карданд.“Оперативное прикрытие” бо такя ба манобеаш хабар дод, ки рӯзи 6 март се нафари гумонбаршаванда дар қатли ин духтарро дар се суроғаи мухталиф дастгир карданд. Аз ҷумла Қудратуллоро, ки 25 сол дорад, дар толори байналмилалии фурудгоҳи “Пулково”, Ҳусниддини 27-соларо аз назди бинои №17 дар кӯчаи Кантемиров ва Бахтиёри 47-соларо дар кӯчаи Пражская дар шаҳраки Кудрово дастгир кардаанд. Бино ба маълумоти тафтишот, рӯзи 18 сентябри соли 2021 ин се марди зодаи Тоҷикистон он духтари ҷавонро бо мошини “Фолксваген Ҷетта” ба як ҷангал дар наздикии деҳаи Мяглово бурда, дар заминаи хусумати шахсӣ ба бадани ӯ аз пистолети травматикӣ ду тир холӣ кардаанд ва сипас ӯро бо як оҳан то мурдан кӯфтаанд. Баъди куштан онҳо чашмони духтарро ба кадом далеле канда гирифтаанд, Зоҳиран бар пояи ин бовар, ки мегӯянд, гӯё пеш аз мурдан чеҳраи охирин касе, ки инсон мебинад, дар чашмонаш абадан нақш мебанданд. Ва аммо дар бораи сабаби чунин куштори бераҳмонаи духтар аз сӯи ҳамватанонаш ба ҷуз аз “хусумати шахсӣ” шарҳи дигаре ҳанӯз дода нашудааст.
