Ҳоҷӣ Исмоил Пирмуҳаммадзодаро дар зодгоҳаш ба хок месупоранд
Ҷанозаи рӯҳонии шинохтаи тоҷик Ҳоҷӣ Исмоил Пирмуҳаммадзода дар зодгоҳаш, деҳаи Санги Кулӯлаи ноҳияи Ховалинг баргузор мешавад.
Дар ин бора аз пайвандони марҳум ба Pressa.tj хабар доданд.
“Ҷаноза имрӯз, 18 май дар намози пешин доир мешавад”- кутоҳ ҷавоб доданд яке аз пайвандони Ҳоҷӣ Пирмуҳамммадзода.
Гуфта мешавад, ки Ҳоҷӣ Исмоил Пирмуҳаммадзода аз бемории қалб дар синни 70 –солагӣ даргузаштааст. Ӯ наттоқ ва ровии моҳир, имом-хатиб, узви Иттифоқи журналистони Тоҷикистон, Аълочии матбуоти Тоҷикистон (2008), барандаи ҷоизаи ИЖТ ба номи А. Лоҳутӣ (2010), Аълочии телевизион ва радиои Тоҷикистон (2012), Аълочии фарҳанги Тоҷикистон (2012), дорандаи медали «100-солагии матбуоти тоҷик» (2012) ва соҳиби унвони «Падидаи сол» (2010) буд.
Бино ба иттилои “Википедиа”, Исмоил Пирмуҳаммадзода 1-уми июли соли 1952 дар деҳаи Санги Кулӯла, ноҳияи Сарихосор, вилояти Кӯлоб таваллуд шудааст. Соҳиби таҳсилоти олист.
Исмоил Пирмуҳаммадзода наттоқ ва ровии моҳир буда, садои шевои гӯшнавозаш дар хазинаи тиллоии радио сабт ёфтааст. Дар радиои ҷумҳурӣ дар хондани «Шоҳнома»-и Фирдавсӣ, «Маснавии маънавӣ»-и Мавлавӣ, «Осори Мирзо Бедил», «Осори устод Рӯдакӣ», «Аз ҳаёт ва фаъолияти халифаи одил Умари Абдулазиз» наттоқӣ кардааст.
Исмоил Пирмуҳаммадзода аз соли 1991 имом-хатиби Маcҷиди марказии ноҳияи Ҳисор ба номи Муҳаммад буд.
